اسلام آباد (نیوزڈیسک) وزیر اعظم شہباز شریف نے کہا ہے کہ پاکستان کی معاشی ترقی کا خواب جلد شرمندہ تعبیر ہوگا، بطور خادمِ پاکستان عوام کی خوشحالی اور ملک کی بیرونی قرضوں سے مکمل نجات تک محنت جاری رکھوں گا، وہ وقت دور نہیں جب پاکستان قرضوں سے مکمل نجات حاصل کرکے معاشی طور پر خود کفیل ہوگا۔ آئی ایم ایف کی جانب سے جاری پروگرام کے تحت مالی اجراء پر ردعمل دیتے ہوئے انہوں نے کہا کہ اصلاحاتی ایجنڈے کے نفاذ اور معاشی ترقی کی راہ ہموار کرنے میں فیلڈ مارشل سید عاصم منیر کی معاونت کا کلیدی کردار ہے، آئی ایم ایف کا اظہار اطمینان معاشی ٹیم بالخصوص وزیر خزانہ کی محنت کا منہ بولتا ثبوت ہے، یہ اس بات کا ثبوت ہے کہ پاکستان معاشی استحکام اور ترقی کے لیے ضروری اقدامات پر عملدرآمد کر رہا ہے۔

وزیراعظم کا کہنا ہے کہ ڈیفالٹ کے دہانے سے ملک کو استحکام اور ترقی کی سمت گامزن کرنا ایک کٹھن مرحلہ تھا جس کے لیے سب نے مل کر قربانی دی، سیاسی جماعتوں نے سیاست کی قربانی دے کر اور قوم نے معاشی مشکلات برداشت کرکے ناممکن کو ممکن کر دکھایا، اللہ کے فضل و کرم سے پاکستان کی معاشی اصلاحات اور ڈیجیٹائزیشن کامیاب کیس سٹڈی کے طور پر دنیا بھر میں مثال بن گئی ہے، استحکام کے بعد ترقی کی سمت میں گامزن معیشت کےحوالے سے ابھی مزید محنت درکار ہے، پاکستان کی معاشی ترقی کا خواب جلد شرمندہ تعبیر ہوگا۔